| 好耐冇出 Post, 唔係因為我懶 (其實係借口) , 而係我去左 QEH 6天渡假之旅. 原因係發燒了好耐都未好, 所以入院搵下原因, Check 清楚 d. 係過年前約好左 2 號朝早 9 點入院, 2 號朝早 8 點 3 已經到左醫院, 係 Canteen 食過早餐後就上左 A8 病房, 
入到病房超多病人, 而我張床就係加床係走廊度, 跟住我睇開果個專科陳姑娘黎左睇我, 我同佢講我好慘, 要訓走廊, 之後佢就幫我同第二個病人轉床, 咁我就轉左入二人房. 
入院前我已準備好晒解悶既野, 有 NDS, MP3, 風筒, 零食, 電話充電器, 仲買左10隻 VCD 諗住帶電腦去睇, 但點知我間房冇電制, 所以風筒, 電話充電器, 電腦都用唔到. 10 點陳醫生黎左巡房, 之後做左一連串檢查. 夜晚完全訓唔到, 行出病房, 坐左係電梯大堂度成幾個鐘, 坐到成1點先返入去, 涼都冇沖, 頭又冇得洗, 跟住我就諗左成晚點先可以用到電, 吹到頭呢? 就係果時比我發現有一個電制係病房大門口, 我係度諗如果陳醫生唔比我 Home leave, 我就夜晚等人訓著左先偷偷地出去充電. 而洗頭就偷偷地出院返屋企洗頭. 好彩 3號朝早 10 點陳醫生巡房時, 我問佢夜晚可唔可以返屋企 Home leave, 佢話有得傾, 不過就要同梁醫生傾下先, 晏 d 再黎睇我. 5 點半再黎睇我之後就話可以比我返屋企 Home leave, 不過第日 4號朝早 8 點就要返去, 因為 8點半有大巡. 果晚返到屋企超級好訓, 由 12點訓到 6點, 冇醒過. 訓醒之後又沖多次涼, 洗多次頭先返去. 4號朝早 8點半大巡, 陳醫生, 梁醫生, 再加多兩個醫生睇我, 佢地傾左一陣之後就話一陣同我做抽骨髓, 同埋做多少少檢查. 12點有個醫生入黎就話而家要抽骨髓, 同我係左邊盆骨打左局部麻醉, 跟住佢拮支針入去抽果陣我就感覺到支針拮到好入, 好痛, 但個醫生拮左好幾次都拮唔到骨, 之後就 Call 返陳醫生返黎同我抽, 陳醫生黎到之後又再同我打多支左局部麻醉同埋止痛針, 再黎拮過, 但都係拮唔到, 果陣痛到出汗, 唔係好大聲咁叫左幾聲, 因為我咬住件衫, 期間拮左好多次, 聽到好多聲 "嗶嗶嗶" 聲, 痛到我都唔知拮左幾多次啦, 又不斷打左幾支局部麻醉同埋止痛針, 最後陳醫生話再試多次, 又再同我打多支左局部麻醉同埋止痛針, 但都好痛, 會感覺到支針拮到 d 骨, 陳姑娘驚我郁, 所以按著我背脊, 不停拍我背脊安慰我, 又讚我叻, 又叫我放鬆 d, 但我真係唔能夠放鬆, 我不停叫好痛, 陳醫生就不停同我講 Sorry, 我感覺到陳醫生好大力咁拮, 而我就不停係度震, 之後我大叫左一聲後就聽到 "嗶" 一聲, 咁終於都拮左入骨了, 終於都成功抽到啦, 仲抽埋一粒骨仔出黎, 但可惜既係我冇睇到自己粒骨仔係咩樣. 最後攪左 1個鐘後, 我就有 3個傷口, 做完之後要訓平 6個鐘, 7點先可以起身, 而我 Lunch 都冇食, 訓又訓唔著, 傷口又痛, 又想去洗手間, 但又唔比落床, 我又唔想係床上去洗手間, 咁就忍左 5個鐘, 到 7點就即係去, 但起身真係好痛, 坐又痛, 行又痛, 屋企人買左野黎比我食, 我都係企係度食咋. 之後又返上床繼續訓. 5號起身落床都有 d 困難, 要慢慢行, 慢慢坐, 成個老人家咁. 之後就識到新朋友仔, 佢18歲, 好好傾, 又扶我行, 我地仲交換左電話號碼, MSN, 咁岩隔離床既病人出左院, 咁我地就同護士長講將佢轉黎我隔離床, 之後陳醫生巡房又同我講 Sorry, 佢真係好好人. 我就同新朋友仔傾計傾左成個下午, 咁先冇咁悶咋, 之後我地偷偷地去病房大門口充電話, 夜晚我叫屋企人充好電拎部電腦黎同佢一齊睇 VCD, 我地閂左燈同埋一邊房門, 成個私人影院咁, 咁就好快咁過左一日啦. 
6號佢醫生巡完房就可以出院了. 而陳醫生仲未黎睇我. 下午有朋友過黎同我食 Lunch, 咁佢就幫我偷偷地落去 1/F 洗手間換左條褲, 跟住我就同朋友搭 Taxi 落左去佐敦食 Lunch, 好快就食完搭返 Taxi 返去, 好彩冇比人發現我偷走左出去咋, 之後陳醫生 5點先黎. 佢比我返屋企 Home leave, 第日 7號 3 點返去睇埋隻手, 之後就比我出院,本來醫生唔比我出院住, 只係比我 Home leave, 要我星期一再返去. 但要做既檢查都已經做完, 返去都只係等報告, 佢又知道我好慘好悶, 所以最後醫生都比我出院. 今日正式出院. 但個傷口仍然好痛, 仍然未搵到原因, 下星期還有其他檢查, 不過就唔駛入院啦. 尋晚又係好好訓, 由1點訓到10點, 中途冇醒過, 因為之前幾日都冇訓過覺. 係 4號果日就有 2個婆婆過左身. A8 所有既姑娘都好好人, 對我好好, 真係好多謝你地呀. |
